毛呀毛　我數呀毛　週丫身都有呀毛
頭呀上　身呀上　總之我通通都數到嘞
……
（註：只要記得星爺唱過嗰首「無自由，我失自由……」就唔會唔識唱上面嘅歌詞） 

　　廟街歌王尹光叔叔大唱數毛歌，雖則由胳肋底毛、鬍須、頭毛一直唱到鼻毛、眉毛甚至心口毛，重叫人「唔好會錯意」，但實際查實佢就係想人會錯意，人人都知佢想數乜毛。皆因「數毛」一詞係流行嘅市井俗話。
　　咩叫「數毛」？數嘅又係乜嘢毛呢？當然係指啲唔見得光嘅毛啦，男女皆可數，冇必要畫公仔畫出腸啦。查實，呢個世界上係唔會有人真係走去「數毛」嘅，除非真係甩毛甩到所剩無幾而顧影自憐嗰啲。所以，真正用到嘅，都係佢嘅引申義，據我所知，「數毛」可以表達三個意思：
　　1、無聊之極。（悶到成晚喺度數毛）
　　2、小便。（澤西，你腎虧啊？五分鐘入厠所數一次毛！）
　　3、做嚟都多餘。（你同佢講咁多嘢數毛咩！）呢種用法較為少見，因為個「托」字更好用。呢個「托」以後肯定會講到。
　　套用《三笑姻緣》入面嗰句「拜得神多自有神庇祐」，我都奉勸各位數毛愛好者一句「數得毛多實有毛脫落」，小心，小心！

copyright：本文版權屬於粵語協會