某市媒體吹噓該市「轄區群衆安全感滿意率調查90%以上」，遭網民一片聲討之聲。無獨有偶，國家某班所謂專家之前公佈一項研究，號稱該國政府乃「全世界最負責任之政府」，更遭全國人狂插。
　　以前介紹過個「屌」字，其中有一個意思係「鬧」，所謂「博屌」，即係「想畀人鬧」，當然，呢度嘅「鬧」已經名詞化咗，係指「博取到駡聲」。發出犯眾憎嘅行為或者言論，就係「博屌」，上面所舉兩例，都係「博屌」嘅典範。由於有人天生犯賤，博屌嘅例子重有好多，例如貼出諸如「說普通話，做文明人」、「校園內請說普通話」之類無稽標語者，博屌；某講出「我的官職比你們的市長還大，你們算個屁」之前高官，博屌；半夜時分開大喇叭大聲唱K者，博屌……
　　有個詞同「博屌」意思相同，亦甚有意思，就係「五行欠屌」。想必係演變自「五行欠打」（「五行欠抦」），而「五行欠打」又係嚟自五行學說，五行就係金、木、水、火、土，所謂嘅「五行欠×」係指體內缺乏某種元素，需要後天補充云云。所以「五行欠屌」，即係「前世未畀人屌夠」，今世要做返多啲嘢嚟「博人屌」。
　　除此以外，與「博屌」意義相同嘅，重有好幾個詞：「攞屌」、「唔屌唔安樂」、「屌得少」……所以話粵語詞彙豐富，即使係粗口，都可以搵到好多替換詞。

copyright：本文版權屬於粵語協會