琴晚，終於睇咗原聲版本嘅《葉問》。作為練習詠春之人，而且作為佛山人，咁遲先睇呢齣戲，真係有啲慚愧。由於之前聽到好多對呢部片嘅讚譽之聲，所以一開始就對佢期望好高，睇完之後並冇特別驚喜嘅感覺。冇驚喜並唔係話呢齣片唔好，而係所有本應令我驚喜嘅嘢經已一早預咗。

　　無可否認，《葉問》係一齣成功嘅電影，起碼係近幾年一部最出色嘅功夫電影之一，其中嘅武戲部分冇令我失望。接觸詠春僅僅數月嘅甄子丹，能夠將一代宗師嘅功力以及詠春嘅神髓淋灕盡致展現出嚟，一來得益於甄先生嘅武術根底以及非凡嘅領悟力，二來要歸功於對詠春甚為熟悉嘅武術指導洪金寶設計出最能表現詠春寸勁短打特色嘅動作。據說成齣電影總共有十二場打戲，場場精彩，各有特色。最美中不足嘅就係，最後對日本人嘅決鬥唔夠激烈，呈一面倒之勢，畀人高潮之處未能達到高潮嘅感覺。不過話時話，實際嘅詠春搏擊中，都係幾秒解決問題，並冇太多你來我往互有功防嘅花巧動作。

　　講到文戲，就有啲失望喇。失望並唔在於文戲太少抑或演員演技唔好（相反，甄子丹嘅演技大有進步，比我預期已經好咗好多），而係在於劇情嘅設計與現實差距太大，令熟悉葉問嘅人睇落覺得好唔慣。呢度略舉幾點，等其他人對真實嘅葉問都有多啲認識：
　　1、日本軍隊未進駐過佛山，只係從佛山汾江河以北經過，佛山當年有幸避過一劫據說係多得有佛保祐。但電影中講到日軍侵入佛山，連葉問嘅大屋都搶埋，同實情差距好大。
　　2、葉問同日本人根本冇過節，而且佢早年有去過日本留學，唔會唔識聽日文。
　　3、葉問根本冇同日本人打過擂臺，喺佛山時亦根本冇咁出名，佢只係私下收過幾個徒弟。
　　4、葉問去香港唔係因為日本人，而係。。。。。。佢赴港嘅時間係1949年。。。。。咩原因，相信唔使多講。
　　5、葉問只係一個愛好詠春嘅富家子弟，並冇咁多民族大義，佢將詠春發揚光大亦只係歷史嘅偶然。當然，詠春得以有今日確實係因為葉宗師。
　　6、葉問老婆邊有咁靚。呢樣係人都知，亦情有可原，為咗票房，當然係搵個養眼嘅花瓶做女主角好啲啦。
　　7、葉問嘅佛山口音好重，香港拍出嚟嘅電影，當然唔可能搵個又打得，又識講佛山話嘅演員。但，甄先生嘅懶音實在犀利咗少少，「恨運」、「緊係」……好難接受一個有懶音嘅葉問，不過講到身手，除咗甄子丹，都冇第個合適架喇。
　　8、武館街根本就唔存在，葉問只係詠春拳嘅高手，但喺佛山，其他拳術一樣高手如雲，劇中講到其他武館師父都好水皮，即使為咗襯托葉問高手都唔使噉啩？
　　9、其他人物，例如李釗、武癡林等人，就更加係杜撰。

　　雖然如此，呢個編出嚟嘅故事都算有紋有路，只要忘記劇中主角叫葉問，呢齣戲絕對好睇過李連傑嘅《霍元甲》。

　　最後講多個笑話，據說一部介紹李小龍嘅英文紀錄片，經過福建某間音像公司繙譯成中文字幕之後，詠春（Wingchun）變成「翅膀春」，葉問（Yipman）就無端端變咗個鬼佬「依普曼」。真係阿問公都會畀呢班白癡仔激返醒。

本文版權屬於UngooChan，轉載務必註明出處