人生就如五味瓶,當你重以為係一種一種品味緊嘅時候,其實你嚐到嘅已經係五味俱全,各種滋味混雜喺一齊架啦。
細個時,總想可以做一個可以畀每個人喜愛嘅人,但之後卻發現,呢啲之不過係一個天真嘅奢求,一個冇法實現嘅幻想。因為即使你從來都未呃過人,未害過人,最終講出嚟都冇人會信你;即使你好努力噉控制自己嘅情緒或者提升自己嘅質素,到頭嚟都會有好多時候無法擺脫煩惱,會畀無端端曲解用意。“解釋便係掩飾”,呢句話經已證明咗人與人之間嘅隔膜同猜疑。其實有乜大不了呢?做短短幾十年人,來去匆匆,做好自己,其他鍾意喺一齊咪一齊囉,唔鍾意嘅可以隨時過主,冇必要強求人。人,已經畀太多雜亂嘅嘢綑綁咗,唔通重要加多一個,畀自己綁住咩?
講返轉頭,人確實又係一種極度可悲可憐嘅動物,因為人唔好意思似狼虎惡得咁露骨,蠻得咁直接,但又天生咁賤格,偏偏有咁重嘅私心,易暴易怒。
我鍾意同有自我覺悟感嘅人一齊,因為同佢哋傾偈、相處會覺得好輕鬆,冇咁大壓力,鍾意可以直接講,唔鍾意都可以直接講,但從來都唔係嘲笑,而係誠懇嘅意見。“人生得一知己經已足夠”,好彩我經已搵到,所以我哋彼此珍惜,從來冇半句怨言,即使犯錯都唔需要解釋同道歉,皆因彼此信任!唔係分分鐘相對,但卻分分鐘唔會覺得孤寂,即使半年一見,都依然覺得親切,哈哈!呢啲可能就係友誼嘅可貴之處。
有時候真係應該感激自己嘅生活歷程,雖然有時“山窮水盡疑無路”,但係總會有“柳暗花明又一村”嘅一日,佢畀咗我好多珍貴嘅嘢,有朋友,有難忘嘅回憶,有際遇,有成功嘅喜悅,亦都有挫敗嘅教訓……喺不斷嘅經歷中思想都唔聽噉變化,雖然而家有時都會好幼稚好天真無知,不過經已現實咗好多喇。人嘅一生,點會冇煩惱,冇悲哀,冇發嬲嘅時候呢?至緊要係點樣令自己可以盡量將呢啲時間縮短,忍得就忍,忘卻煩惱,減輕痛苦同心理負擔,做人係應該做得灑脫啲,學識“拎得起放得低”。
緣由心生,隨遇而安,心無掛礙,一切隨緣……整理好心情迎接新嘅一天!