天口臖，食乜都冇胃口，唔中暑都感暑啦！（查實，感暑同中暑咪差唔多？！玩下文字遊戲啫！ ）

一到呢個時節，啲冬瓜擺到成個街市都係，唔買都睇下，時菜時食，你唔買就執輸嘞！聽講，冬瓜有九程九係水，飲水咪得囉！使乜食佢呀？噉你就冤枉咗冬瓜喇！冬瓜唔止食得，重有消暑解渴、利尿嘅功效。

冬瓜寡淡，確係冇乜好食，但係有道廣東名菜「冬瓜盅」，搞到啲冬瓜鬼咁好食；若果你唔想搞咁多花款，簡單啫！鹹蛋滾冬瓜，寡？田雞炆冬瓜，鯇魚尾滾冬瓜，或者魚心炆冬瓜乾（呢度要柬大魚，我哋鄉下叫鰫sung4魚，俗稱大頭；呢個時候，我食冬瓜乾唔食魚囉！點解？咪係啲冬瓜乾欶晒啲魚味囉！），夠和味喇啩？！可能你會話而家啲魚冇味，噉又係嘅，刮塘魚冇賣廿年囉！

844952.jpg

冬瓜盅

綠豆同冬瓜嘅功效差唔多，都係防暑消熱嘅，但係多咗解毒、止痕嘅功效。故此，蚊針蟲咬，五行欠打——身痕，都啱食咖！ 食法好簡單，煲綠豆水，至緊要落件陳皮（我查過，家陣市面好少可有臭草賣，唔係加臭草都幾好咖！），煲好落紅糖，食得。鍾意飲冰水、食凍嘢嘅人，將啲綠豆水（查實而家啲綠豆好揀手，煲出嚟真係會起沙，叫綠豆沙都得。）擠入個雪櫃度，擺得一個時辰咁上下，就有綠豆冰食嘞！好過你去食雪糕，冇益嘅。

綠豆沙.jpg

綠豆沙

講飲講食講排場，梗係外外星人至似樣。大家畀啲掌聲好嘛？

844952.jpg

綠豆沙.jpg