考試三十八

 

西關G肉佬嘅粵文原創好有意境！等我都嚟試下先！

 

情景：八十年代中廣州市嘅一處國營工廠職工宿舍樓裡頭

 

-----------------------------

 

亞媽：開咗學咁耐，未聽妳講過話要測驗考試嘅，仔？

 

蚊仔：得喇。

 

老竇：得咩吖，而咖功課點？快啲講！

 

亞媽：前兩日我先見過妳哋班住喺我哋五樓嘅雯女，佢話佢前兩日先語文測驗嚟，妳張卷呢，仔？

 

蚊仔：喺課室櫃筒，冇帶返嚟。

 

老竇：冇帶返嚟？扐書包過嚟畀老竇睇下，快啲！

 

老竇：唔扐吖話！......  死仔包！呢張咩嚟咖？三十八分！妳讀咩咖？讀屎片吖！食塞米！

 

亞媽：上課唔留心，成日顧著玩，去哨街，去瀝水妳就知碇。

 

蚊仔：唓！今次考得咁難，大把人唔合格喇！十幾廿分嘅不知幾多！我咪算好囉。

 

亞媽：死仔幹！仲喺度叻唔切！

 

老竇：仲敢牙斬斬！捉妳過嚟藤條炆豬肉！

 

蚊仔：亞嫲亞嫲亞嫲！

 

老嫲：細蚊仔慢慢教囉，佢可能一時心塞啫。

 

亞媽：妳隻匪類頭！平時百鬼厭唔突止，而咖仲學識牙尖嘴利添！

 

蚊仔：唓！啲亞叔讀書嗰陣仲屎過我喇！佢哋仲成日群埋群埋班人撩事鬥非添！我咪算好囉！

 

五叔：喂喂喂！做乜擺埋我上檯吖細路？！嗰時係文革，點同咖下吖？

 

亞嬸：噉又係，嗰時冚世界都唔讀書咖喇，考到三十八經已好威水！

 

蚊仔：咪係囉，咪係囉，考到三十八經已好威水咖喇！

 

老竇：我威妳個頭！

 

蚊仔：亞嫲亞嫲亞嫲！...... （慘叫中）！