做乜Q今次講個Q？因為啱啱聽完《蕭鼓聲中》，「Q」係蕭生嘅至愛用語——之一，而且重運用得好Q出神入化，除Q咗我，冇乜邊Q個拍得住佢。

　　Q，本來係士碌架術語，即係話支波棍，來源於英文嘅cue，所以，有「厾Q」、「撻Q」呢啲講法。有人話，因為Q係棍，而棍又係「㞗」（俗寫「鳩」）嘅代名詞，所以Q變成「㞗」嘅代稱。我唔肯定呢種講法係咪有根據，不過Q嘅用法確實同「㞗」好似，而且又文雅好多，咁好用，照用可也！

　　另一個字，「鬼」，都成日用嚟代替「㞗」。論威力，「㞗」>「Q」>「鬼」，如果你喺啲唔方便爆粗嘅場合，又嫌「鬼」字太「娘」，「Q」係最佳選擇。

　　附帶一提嘅係，「Q」字雖然有好多用法，但唔可以做形容詞，否則，就會變咗另一個意思，你好Q！鬧你變咗贊你，因為呢個時候，Q唔再係cue，而係變成cute！