各處鄉音各處聲 頭炮佛山話速成

       幾年前，省城流行一句slogan：「廣州人講廣州話，聽唔明就返鄉下」，雖則當時講緊另一件事，「鄉下」亦並非指嶺南之水鄉，但今日睇返，確係至理名言。省城話源於四鄉，其中甚多字詞仍可從周邊鄉下話中搵到本源。若然返鄉下走一轉，對省城話必然瞭解更深。

       睇電視電影，插入幾句鄉下話，例如臺山話、潮州話，又或者佛山話（順德話），都可收諧趣之效，最近網絡上流傳數段「張槎話」配音短片，亦甚受歡迎。有見及此，本網特設四鄉話專題，幫助各位看官老友記快速學講幾句特色鄉下話，頭炮就由同屬粵語廣府片嘅佛山話開始。佛山係最接近廣州嘅城鎮，但此地語言已與省城話頗有分別。本文以佛山舊城區話爲參考，從聲母、韻母、聲調以及習慣語四方面與省城話比較。

聲母  t —> h

    佛山話聲母最大特點就係冇t，省城話以t為聲母嘅字，佛山話一律以h代替。「天天見面」講成「牽牽見面」、「通殺」講成「兇殺」。有句水蛇春咁長嘅佛山話「音謎」曰：「鹹紅學紅蝦蟹蟹牽牽慶起空航虛氣heng」，答案乃「譚同學同他太太天天挺起胸膛推氣艇」。更有頑固人士，將此規律應用至其他語言，因此「普通話」變成「普哄話」，「太陽」變成「害陽」。

    除此以外，另有個別字嘅聲母有變化，不過難以總結。例如「佢」[keoy5]，佛山話大多將其讀成[heoy5]；「瞓」[fan3]讀作[han3]（按：省城話亦有此讀音）。

韻母

1、i[*衣] —> yu[*於]

    而家，相當多人都會開玩笑，將「咩事」講成「咩樹」或「咩樹幹」，查實此讀音來源於佛山話。佛山話之中，韻母i[*衣]通常都讀成yu[*於]，例如「寶芝林」變「寶豬林」，「廁所」變 [處所]，「絲」變「輸」，故此佛山人稱「絲瓜」做「勝瓜」，皆因「輸輸」聲唔好「輕（聽）」。更有甚者將此規律應用至北方官話甚至英語之上，某化學「老書」上堂用官話講解「原子」、「分子」，讀爲「原祖」、「分組」；某電腦sale士更同個客講：「要format個『輸盤』（C盤）」。

2、aau[*教] —> eu（近似讀如英文字母L）

部分字有此類現象，如「搞」讀作[geu2]，「瞓覺」讀作[han3 geu3]，但此規律不能濫用，事關好多字係唔需要變音嘅。

查實，根本係音素aa同e之間嘅變化，此現象可引申到「八」嘅發音，由[baat3]變爲[bet3]。以此規律讀「八百八十八」，反爲清晰得多，唔會發生「八」、「百」難分嘅懶音通病。

聲調  陽平聲－>陰平聲高降調

    佛山話嘅聲調規律只得一個，就係冇陽平聲，但凡省城話讀陽平聲嘅字一律轉調為陰平聲嘅高降調，調值與漢語拼音之去聲（第四聲）相若。例如「人客」讀若「恩客」，「同學」讀若「空學」，「大麻成」讀若「大孖陞」。講就簡單，但聲調嘅變化嘅嘢好蝦人講，好多貪過癮想學佛山話嘅人就係拿捏唔凖聲調變化，唔該變嘅亂變，該變嘅又變咗第個調，講到唔湯唔水，唔鹹唔淡。

習慣用語

除讀音以外，仲有部份用詞同鮮見於省城話，略舉數例。

嚕/阿——嗰：嚕個（嗰個），嚕便（嗰便），阿時[si2]（嗰陣時），阿啲（嗰啲），又呢又嚕（又咁又咁、又這又那）

喺蓋——喺度：哥記喺唔喺蓋？（阿哥喺唔喺度呀？)

去歸——返屋企：去歸喫飯（返屋企食飯）

命——未：「未曾」連讀，即成「命」音，故「命輕過」即「未聽過」。

eu——叫：eu佢返嚟——叫佢返嚟

就間/舊間——頭先/正話：就间重喺盖/喺处。——頭先仲喺度。

嘵[heu1]——咗：嘵功課命？做嘵。（做咗功課未？做咗。）

罢——完：食嘵饭唔曾？就間食罢，食嘵三碗。（食咗飯未？啱啱食完，食咗三碗）

[leon5]（近似「論」）——满—>：[leon5]瀉喇，快啲閂水喉！（满瀉喇），咪裝咁[leon5]（咪裝咁滿）

嫩蚊仔/二蚊仔——细蚊仔

耄記——阿嬸、師奶

揩理（讀音近似粗口，慎用）——碌葛、死得：「揩理！架車爆呔！（弊！架車爆呔！）」「我識換呔㗎，不過你冇士啤呔啫。」「咁就揩理喇。（咁就死得。）」

歌仔都有得唱

    廣義嘅佛山話亦包含石灣、張槎、灡石等口音。相較於佛山舊城區話，石灣話口音更濃，比省城話變化亦更大 。例如「眼」係[en5]，「煙」係 [en1]，三個人稱代詞「我」、「你」、「佢」分別爲[oi5]、[li5]、[kyu5]。有隻用石灣話唱嘅歌仔：

  石灣[wen1]石灣[wen1]好多煙[en1]

  煙[en1]親我[oi5]隻眼[en5]

  醫來[loi1]醫去都醫唔[m1]返[fen1]

  我[oi5]以後都唔[m1]去石灣[wen1]

    隻歌仔過癮在，用石灣話唱嗰時，原來係押韻嘅！