《食神》精選對白

片段一：失败嘅嗱喳面

剧情：史提芬周喺火鸡姐嘅面档叫咗碗嗱喳面之后开始狂踩。

史提芬周：碱水面冇过冷河①，所以成碗汤有碱水味。鱼蛋亦都冇鱼味，但系你为咗掩饰，专登加啲咖喱汁将佢做成咖喱鱼蛋，但系噉做太天真嘞，因为你煮嘅时间唔够，咖喱味根本只系喺表面，而冇入到里便，掂到汤之后重要冲走埋。好好地一粒咖喱鱼蛋，畀你整到冇鱼味亦都冇咖喱味，失败！萝卜冇拣过啦，太多渣，失败！猪皮又煮得太腍，冇咬口呀，失败！啲猪红松泡泡，一夹就散，失败中嘅失败！最惨系啲大肠，里面都未通干净，重有嚿屎，你有冇搞错呀？（火鸡埋头做嘢）
史提芬周：喂！屎呀喂！……（一连嗌咗三次火鸡先理佢）
火鸡：攞去抆咗佢吖②！（递厕纸畀史提芬周）
史提芬周：唔好咁幽默好喎！我四围唱你有屎架喎！
火鸡：唱乜鬼嘢呀！话明嗱喳面③有两嚿屎有几咁奇呀？廿三文呀！
史提芬周：你畀我呀？
火鸡：嘘！
史提芬周：畀下面啦！话晒都食神呀！
火鸡：食神？
史提芬周：食神！
（两人对望良久）

①将煮过嘅食物用冷水或冰水略冲洗一下，再继续炒煮，令其更爽口。过冷河系一种常见煮食方法，特别适合于煮面。
②“抆”通常同“屎”搭配，只限用于人身上。戏中火鸡叫史提芬抆条猪肠，系对佢最大嘅讽刺。“屎尿屁”用得适当，都可以搞笑而唔俗。
③嗱喳面即杂碎面，包括鱼蛋、猪红、猪皮、萝卜和猪大肠等配料，睇上去纳纳集集，显得好“嗱喳（唔干净）”。

本文版權屬於粵語協會，轉載務必註明出處