天才白癡夢

　　被稱為粵語歌開山鼻祖嘅許冠傑，以其地道口語化嘅“粵式鬼馬歌”最為人津津樂道，但係唔講你唔知，阿Sam（許嘅英文名）寫古雅嘅歌詞一樣咁掂，其中一首我最鍾意嘅就係飽含哲理嘅《天才白癡夢》，喺情歌泛濫嘅今日，更加使我回味無窮。呢首歌係電影《天才與白癡》嘅插曲，呢齣電影當年刷新咗港產片票房嘅新紀錄。
　　好多人都識講“人生如夢”呢句話，但人生點解如夢，人點樣衝出夢境去追尋自己嘅人生呢？阿Sam同詞人薛志雄為我哋一一道來。
　　人皆尋夢/夢里不分西東/片刻春風得意/未知景物朦眬/
　　人生如夢/夢里輾轉吉兇/尋樂不堪苦困/未識苦與樂同/
　　人生本來就變幻無常，觸摸不定，樂極可以生悲，否極又會泰來，任何事情都吉兇難定。生活流驅使中，追求名利夢想嘅你，開始變得麻木，黑白是非已難分辨。夢境唔係正正一樣咩？喺夢裏面，你分唔清方向，分唔清時間，啱啱重喺屋企，即刻又去咗好遠嘅地方；正話重同緊舊同學一齊，轉面就變咗新同事……
　　南柯長夢/夢去不知所蹤/醉翁他朝醒覺/是否跨鳳乘龍/
　　何必尋夢/夢里甘苦皆空/勸君珍惜此際/自當欣慰無窮/
　　有時，你會沉溺於一個不切實際嘅夢，驟然醒覺，發現原來呢個夢根本唔係你真正想要嘅嘢。之前嘅一切有如南柯一夢！
　　副歌部分係全曲嘅高潮，雖短，卻字字珠璣。
　　天造之材/皆有其用/振翅高飛/無須在夢中
　　阿Sam肯定係讀過李白《將進酒》嘅名句“天生我才必有用”後有所感悟。每個人都有過人之處，天才同白癡嘅分別就係：天才識得發掘自己嘅天賦，而白癡只知道抱怨，只會日日發白日夢！如果個個都可以立志奮發，夢中嘅美景何嘗唔可以變成現實？反之，縱使你身懷絕技，天資聰穎，卻終日沉醉於幻想當中，而付出努力，噉上天亦一樣係唔可能寵幸於你而使你成為一名天才。
　　成首《天才白癡夢》貫穿一個“夢”字，蘊含嘅道理可深可淺，每個人都可以悟出自己嘅啓示。當然，歌係愛嚟聽嘅，呢首歌嘅旋律簡單而優美，如果你唔想諗太多嘢，不妨眯埋眼細聽，感受一個夢之旅。