講到盧冠廷，可能最多人熟知佢為《西遊記仙履奇緣》唱作嘅《一生所愛》，今次要講嘅卻係另一首經典情歌。最近睇Uncle Lo Lo嘅演唱會，重聽咗當年佢寫畀譚校長嘅《愛是這樣甜》，別有一番味道。Lo Lo嘅聲音具有一種特別貼近大自然嘅感覺，唱呢類清新嘅歌合適不過。點樣嘅愛係最甜呢？歌詞為聽衆細細道來：
期望每朝早/起身一吻紅的臉/共回味情夢最甜/新鮮早餐奉獻
期望每朝早/返工衣著同挑選/一切一切共分享/愛是這樣甜
共做晚餐談笑/你要呷醋我落鹽/飯後你織毛衣/還未著上都溫暖
每個早晚都可以見到自己嘅愛人，同佢分享生活中嘅點滴，哪怕係琴晚發嘅一個甜夢；小夫妻可以一齊為小家庭出一分力，齊做晚餐時“你呷醋我落鹽”，飯后我洗碗時你織冷衫……幾咁純樸，卻係幾咁甜蜜。
最欣賞呢一段：
住在這小房間/說說笑笑也纏綿/但願我的旁邊/長伴有你天天見
呢個幾美滿嘅小家庭，幾令人嚮往！可惜，社會越發達，愛就越唔純潔，真摯嘅愛亦都越嚟越少。唉，如果而家你重住喺間「小房間」，重有幾多個女仔肯長伴你一世！
愛，一定要轟轟烈烈，生離死別？愛，一定要甜言蜜語，日日驚喜？愛，一定要有車有樓，有金有銀？有時，簡簡單單嘅愛就如細水長流，恆久而甘甜。平凡嘅愛如果能夠五十年不變，就絕對唔平凡。
本文版權屬於粵語協會，轉載務必註明出處 | 