嶺南嶺北，各方面差異甚大。即使1949年後全國都只用一套「人教社」欽定教材，但歷史沉積落來，至今中小學校內依然有唔少獨特用語。各位不妨回憶回憶：
「考考考，老師的法寶。分分分，學生的命根」。考試後，老師閱卷，粵稱「改卷」。老師判對打鉤，粵稱「剔」，此語源自英文「tick」。
以前學生之間打交係平常事。一方打傷另一方，有時要賠償醫藥費，粵稱「賠湯藥」，標準的古漢語。老師體罰學生的方式，有一種叫「罰企」，「企」亦係古漢語。放學後老師唔准學生返屋企，粵稱「留堂」。此語有清末民初時稱新式學校為「學堂「的痕跡。無理由缺席，嶺北稱「曠課」，49年後漸漸普及，但其實以前稱「走堂」。此講法港澳地區至今依然保留，華僑色彩濃厚的暨南大學亦可經常聽到。
以前學生的遊戲，南北基本一樣，但叫法唔同。捉迷藏，粵稱「摸盲鯭」。捉人，粵稱「捉伊人」。至於「騎牛牛」、「趌跛跛」、「拍公仔紙」，「射紙雞」等等，在下實在唔知北方叫乜嘢,期望各位賜教。
相關討論帖：http://bbs.cantonese.asia/viewthread.php?tid=5516 | 