不經不覺，霑叔離開我哋經已五年。時至今日，佢爽朗嘅笑聲重不時回蕩於耳，令人諗起《笑傲江湖》入面能令滔滔兩岸起潮浪嘅一聲笑。有人話《滄海一聲笑》係最能够代表佢嘅一首歌，但我認爲，豪邁嘅笑聲，只係霑叔嘅一部份，真正能够反應佢內心世界嘅，應該係呢首：
忘盡心中情，遺下愛與痴，
任笑聲送走舊愁，讓美酒洗清前事。
四海家鄉是，何地我懶知！
順意趨寸心自如！任腳走尺軀隨遇！
……
由黃金組合顧家煇同霑叔炮製出嚟嘅《忘盡心中情》，係霑叔最得意嘅一首作品。歌詞彷彿令人感受到一段愛恨交織嘅往事，壓喺主角心中，但呢位主角卻要從過去盲目投入、狂熱追求嘅「愛與痴」走避出嚟，灑脫中仍蘊含一種無奈，無奈中又帶一絲依依不捨嘅哀愁……呢首係電視劇《蘇乞兒》嘅主題曲，主角表面上係由發哥扮演嘅蘇乞兒，但實質上歌詞嘅內容正係填詞人嘅真實寫照。熟悉霑叔嘅人都知道，佢唔係嗰種文質彬彬嘅斯文書生，而係酒色財氣樣樣齊嘅「不文」才子。性格直率，令霑叔得到好多朋友，可能亦都失去好多朋友，當佢唔開心時，唔理係邊個，都會爆出一段「三字經」，但「笑聲送舊仇，美酒洗前事」，一醉泯恩仇，甚少記仇。
不過，有一段恩仇——或者叫情緣，到最終都未能化解，就係霑叔同林小姐嘅愛恨情緣。雖然兩人因爲某啲原因而老死不相往來，但可以肯定嘅係，霑叔到生命最後一刻，都依然對林才女有情。「昨天種種夢，難望再有詩，就與他永久別離，未去想那非和是」，一個表面上玩世不羈嘅浪蕩才子，實質上係一個情深嘅人，可惜「此情已隨君體去，難忘再有詩」。
一首歌之所以成爲經典係因爲後無來者，試問今日嘅填詞人，重有幾個寫得出「順意趨寸心自如，任腳走尺軀隨遇」、「披散頭髮獨自行，得失唯我事」呢啲甚有古風而又淺白易懂嘅句子呢？一個人之所以成爲傳奇，亦係因爲後無來者，環顧今日香港乃至廣東，重搵唔搵到一位好似霑叔噉嘅集通俗與文雅於一身，集豪邁與深情於一心嘅奇才？「五嶽歸來不看山，黃霑歸來不看嶽」！
本文版權屬於粵語協會，轉載務必註明出處 | 