| 西關十八甫係從第二甫開始，冇「第一甫」，只有「第一津」，故此有句歇後語：「第一津——冇譜（甫）」。「冇譜」同[離譜]，挐樂譜有關，一個係「冇譜跟」，一個係「有譜都唔跟」，都係形容人做嘢亂嚟，唔合常規。 「靠譜」係從「離譜」相反意思衍生出嚟嘅潮語，但「靠譜」嘅反義詞並唔係「離譜」，而係「不靠譜」。雖然好多人都未必講得出呢兩個詞嘅準確意思，但有樣嘢係冇爭議嘅：「靠譜」係讚，「不靠譜」係彈。 時至今日，無論上網抑或聽人講嘢，都冇辦法避開「不靠譜」嘅衝擊。如果要轉返做粵語，應該點講呢？有人話係「唔靠譜」，呢種硬譯法，同「給力」譯成「畀力」一樣咁「唔靠譜」。查實，視乎上下文語境、語氣，「不靠譜」喺粵語入便大大話話有幾十種表達方式。例如： 1、這個人不靠譜，老是聯繫不上他。——冇嚟搭霎 2、你還是不要指望小安了，他不靠譜的。——生蟲拐杖，靠唔住 3、靠罰款來增加財政收入這種方法很不靠譜。——唔係路 4、那種所謂神奇療法完全不靠譜。——搵笨 5、很快，外國的文憑也會變得跟中國的文憑一樣不靠譜。——冇用、廢、流 6、粵語十大不靠譜的口頭禪。——無厘頭 7、說話大聲，但又不靠譜，老說錯話。——聲大夾冇凖 8、港産片《我老婆唔够秤2》，大陸版本叫做《我老公不靠譜》。——原版叫《我老公唔生性》
粵語本來係精緻嘅語言，細微意思差別可以用唔同字句表達，可惜由于人思維懶惰，好多生動字詞都逐漸荒廢，被幾個百搭潮語食晒。結果，粵語變得越嚟越「不靠譜」——粗鄙、墮落（自甘「墮落」，仲大鑊過「衰落」）。 |
Powered by Discuz! X3.5 Licensed
© 2001-2024 Discuz! Team.
