粵語九聲 音樂天成

時時聽聞粵語有九聲，實情係邊九聲？借用同聲調漢字，爲：「芬、粉、瞓、墳、憤、份、忽、法、佛」，對應學名爲：陰平、陰上、陰去、陽平、陽上、陽去、陰入、中入、陽入。

心水清者發現，十以內嘅數字啱啱數得晒九聲出嚟：「三、九、四、零、五、二、七、八、六」。亦即係話，從零數到九，經已讀晒全部聲調出嚟，難怪粵語讀數字咁高低抑揚。若然仲係嫌記得辛苦，咁不妨用有意思嘅字串埋幾個聲調，例如「三點半 嚟我度 乜節目」、「中港澳 尋買賣 必發達」。

有樣嘢仲神奇，「陰平」嘅「陰」字本身係陰平聲，屬於「陰聲字」，而「平」字本身係陽平聲，屬於「平聲字」，而其它嘅「上」、「去」、「入」亦分別係「上聲」、「去聲」、「入聲」，你話粵語嘅設計係何其科學，何其精細呢！

粵語聲調豐富，同音樂天然結合，填過詞嘅人，最有體會。例如呢句歌詞：「河水彎又彎，冷然説憂患，別我鄉里時，眼淚一串濕衣衫」，以粵語讀出嚟接近按旋律唱嘅效果，但係若果用國語讀，讀完肯定唔知首歌係點唱嘅。古代嘅詩詞，往往直接唱得出嚟，特別係宋詞，根據詞牌格式填好之後，歌者就可以演繹出動聽嘅曲調，成爲當時嘅「流行曲」，粵語正正延續咗呢種聲韻特性。所以，下次有人話粵語係「鳥語」嗰陣。你不妨同返佢講，鳥語係天籟之音，講粵語就好似雀仔唱歌咁好聽，唔好咩？