食擔豬膏未落膈，見身喐唔見米白

　　近幾十年，衆人皆奉「發展是硬道理」為金科玉律，莫講話個個城市一個模咁倒出嚟，淨係一大拃石屎森林，好惡搵返舊陣時嘅風貌，就連好多城鎮農村啊，都同以往嘅生活狀態好唔一樣，乜都話加速現代化。而廣府人講說話，好多時同農業耕作有挐掕，當傳統生活景象逐漸式微時，坊間好多生鬼、抵死、到肉嘅講法就冇咗根?，故之然現代化咗嘅廣府話今時唔同往日，聽落就倔擂槌唔夠「親民」。

就以「見身喐唔見米白」為例，若果冇返啲生活體驗，就算你曉噏，都像唔出呢句說話係點嚟嘅。正所謂「知其然而不知其所以然」，唔少人都知係愛嚟形容有啲人周身冇時停、彳亍咁轉，一味喺處好落力咁做嘢，但係收效甚微、冇乜得着，譬如講啲咕喱辛水辛汗先賺得嗰一個幾毫，學生哥死咪書但係成績點都出唔到嚟，都可以話係「見身喐唔見米白」，至於「米白」，係同舊時尋常人家「舂米」個動作有關。舂米就係由上而下使力，分開穀嘅殼同米，喺機械化未普及嘅年代，通常啲人家屋企或者作坊仔、磨米間，就係?舂坎嚟搞掂㗎喇。

舂坎係用石整嘅，中間掏空，圓身尖㞘，座响地底，長木枋造嗰條就叫?[deoi3]，先係將啲谷放晒喺內坎，跟住利用杠桿原理，一個或兩個人喺?[deoi3]尾用腳踹住，一䟴一?[ngat6]，?[deoi3]頭掕住嚿鐵就一下高一下低咁舂嘞，啲谷舂到咁上下嘅時候，啲米肉嘅白色咪出咗嚟囉。之但係呢種咁嘅簡易架撐效率好低，一般舂好耐都舂唔得勻晒啲穀，舂完咗仲要篩走啲糠，有啲未舂得透嘅叫做大穀，仲要攞窩?（簸箕）轉吓等佢埋心，執返出嚟，然之後先簸到啲米剩返落嚟，咁先叫做有米食，若果手勢唔好執唔出啲大穀，就畀人話你唔曉做米。成個過程都幾?[haa1]人做同耽工㗎，收屘整整吓都冇乜人舂米嘞。「見身喐唔見米白」成句就係話?[ngat6]咗半日都未見啲穀甩殼，個心唔煩就有鬼嘞。所以有時要了解某啲俗語嘅來源，真係要問吓啲老人家至得。

　　講開又講，若果有人問起zung¹瘟雞同瞌眼瞓zung¹吓zung¹吓個「zung¹」點寫，睇完以上內容相信都應該曉教人，就係舂坎個「舂」，都係形容動作?[ngap6]吓?[ngap6]吓，下次咪個寫錯喇。仲有，去開赤柱有時間不妨行埋舂坎角，嗰處風景幾好。