端午扒船怕逆風 食糉勿忘樟木櫳

戰國年代，有姓屈名原者，文才過人，奈何痴心錯付，愛國（君）不遂，被奸臣所屈而冇得撈，鬱住鬱住，最終投江自盡。據說世人爲紀念此君而設「端午節」，又稱「五月節」，該日必做兩事，一曰「扒龍船」，一曰「食糉」。廣東話亦有俗語講及此兩事：

「屎艇快過龍船」——舊時城市糞便會運往四鄉肥田，因南番順河網發達，運送工具多為艇仔，俗稱「屎艇」。「屎艇」裝滿「肥料」時，成條河道臭氣遠播，撞正順風，殺傷力更大，由此得「順風屎艇——快夾臭」之歇後語。若然有龍舟遇着屎艇駛來，爲免臭氣侵襲、穢物沾污，必定避讓，等佢順風而過，故此有「屎艇快過龍船」之說。

    「未食五月糉，寒衣唔入櫳」——「櫳」者，有蓋嘅大木箱。舊式木櫳，樟木做嘅爲之至正斗，優質木料，唔驚曱甴蟲仔，?嚟存儲衣物最爲適合。之但係咁，木櫳唔似家下嘅衫櫃，大件衣物一旦摺好擺入櫳，一件沓一件，就好難攞返出嚟。兼且若然有多個木櫳時，一個冧一個，要搵返件衫出嚟就更費周章。廣東冬天時間雖唔算長，但入春之後氣候變化無常，乍暖還寒，一個唔覺意着少件衫，就會凍親。於是民間智慧話過你知，未過五月節，都咪立亂收埋啲冬天衫入櫳。

樟木櫳