連鎖店寶號 論盡麥當勞

       早一輪，美國快餐連鎖店因取消廣東話訂餐熱綫而受詬病，所謂「對錯自有公論，雙脚投票最準」。故此無謂勞氣，坐低飮啖奶茶，食個麥包先講，話晒與M字招牌相識多年，「相逢何必曾Big Mac」。姑勿論店中食物營養價值如何，「垃圾」與否，該店名稱着實有意思，值得本篇專題探討。

       呢間英文原名McDonald's嘅快餐店，初初登陸香港時，未有中文名，時維一九七五年，距今剛啱四十年。因以Mcdonald爲名之西人，一般譯爲「麥當奴」，故曾有人諗過沿用此譯名做店名。但「奴」字有侮辱之意，「當奴隸」，何其政治不正確！於是改「奴」爲「勞」（港人多不能分N、L聲母，故認爲兩字同音），寓意「應當勞動」。查實，以今日之懶音趨勢，「麥」、「勿」趨于同音（否則，何來會以「麥麥送」諧音「密密送」？），「麥當奴」讀如「勿當奴」，「當家作主」之快感即時返晒嚟。

       「麥當勞」嘅故事未完，一九九二年，北京開設首家McDonald's。當其時，貫徹Beckham譯做「貝克漢姆」、Clint Eastwood譯做「克林德伊斯特伍德」之又長又臭焗住音節化入聲尾音嘅傳統，該連鎖快餐店喜獲芳名「馬克唐納爾德」。但市場最終要向品味低頭，好快，「麥當勞」嘅招牌就出現於北京乃至全中國大小城市嘅街頭，一直至今。而「馬克唐納爾德」，就「冇乜人仲記得」。

       今時今日，人人講嘢求簡求快，連「麥當勞」都嫌長得滯。潮語稱爲「老麥」、「麥記」，甚至「M記」，聽落頗有「老友鬼鬼」之親切感。亦有人稱之為「麥當當」，將其擬人化、寵物化。但所謂「入鄉隨俗，入水隨灣」，諸多譯音名稱之中，最有中國古風嘅都可算係——牡丹樓。