寫字點橫竪鈎折 「十劃」何來有「一撇」？

       事情啱啱開始，離目標仲有好遠，形容呢種狀態，有句說話呌「十劃都未有一撇」。講就講得順，不過諗真下，似乎唔多啱邏輯。「寫咗十筆都未寫得一撇出嚟」亦唔代表未寫完個字，事關好多字唔使用到「撇」嘅。

       查實，同另外兩句意思近磅嘅俗語有關。一句係「八字未有一撇」，「八」字先撇後捺，撇都未寫，成個字當然未成形；另一句係「十字未有一劃」，所謂「劃」，實情係「橫」，「十」字若果未寫第一筆嘅「一劃（一橫）」，就即係乜都未有。呢兩句話意思相同，表達形式又近似，所以廣東人講講吓，就唔覺意將兩句話拼合成一句，並以訛傳訛，衍生出邏輯唔通但經已深入民心嘅「十劃未有一撇」。

       講開呢一「劃」，姓王或者姓黃嘅人體會必定最深，因爲廣東話「王」、「黃同音，屬於此兩大姓嘅人向陌生人介紹自己時，往往會加多句補充，「係『三劃王』嘅『王』」或者「係『大肚黃』嘅『黃』」（按：「黃」亦稱「江夏黃」）。所謂「大肚黃」就係講緊「黃」字中間嗰個形似大肚腩嘅「田」，而「三劃王」就係「王」字嘅三橫。雖然「王」有四筆，但嗰一竪唔算係「劃」，而係「戙」。