「老舉」原係眾人妻 花紙盛惠「一文雞」

       廣東話有句歇後語相當抵死，曰「老舉埋年——算X數」（埋年即年終結賬計算盈虧之意，X爲粗口字，看官可自行代入）。

「老舉」係廣東人對一般妓女之通稱，此詞來歷有多種版本。一說，清代名士袁枚於《隨園詩話》卷十二中提到，其偶閱唐人筆記《北里志》，方知唐人以老妓爲都知，分管諸姬，袁枚認爲「老舉」稱謂當由唐人名都知鄭舉舉而來。另一說，清代孫橒《餘墨偶談‧老舉》亦有提及：「粵中呼妓爲老舉，《隨園》以爲即（鄭）舉舉、（李）師師之意。以『舉』與『妓』的粵音相近，老舉即老妓之訛。其説近是。」 其餘穿鑿附會之來歷解釋，無謂盡錄，以省筆墨。

       廣東俗語「老舉衆人妻，人客水流柴」形容妓女之境況。「水流柴」，本指河流上沿水流飄浮而下嘅木頭，岸邊人會執嚟當柴燒。有啲人長年居住艇上唔上岸，無家無業，有如水上漂浮嘅木柴一樣到處漂流，故此又被稱「水流柴」。所謂「人客水流柴」，即指妓女嘅「一夜夫君」，翌日就如被水沖走嘅水流柴，一去不返。

       若然話「老舉」尚有一絲青樓底蘊，咁今日對妓女最流行嘅稱呼「雞」就相形見俗。雖則如此，描述錢銀嘅「一蚊雞」卻與此「雞」有關，且其背景頗有幾分文藝氣息。想當年，青樓「猜飲彈唱靚」範範皆精嘅妓女家教嚴過千金小姐，與恩客交往更有一套制度。尋芳客即使風流倜儻如《胭脂扣》裏嘅十二少，想約會青樓小姐，亦須以一蚊（本寫「一文」，變讀爲「蚊」）買張「票局」（或稱「花紙」、「花箋」），寫上「十二少君呌如花，至金陵酒家，×廳第×房間，侍酒勿延」。至於姑娘會否赴約，就視乎其心情以及對該恩客嘅觀感喇。所以，呢一蚊只算係介紹費，並不保證約會成事，至於後續之飲酒作樂開廳踏艇使費，當然係貴客自理。

       至於「一蚊雞」，其來歷有三說：其一，「花箋」又稱作「楷」，每張一蚊即爲「一蚊楷」，「楷」、「雞」音近，故漸演變成「一蚊雞」；其二，花箋收費一蚊，當時已係平民半個月人工，一蚊夠買成隻眞嘅雞，遂衍生「一蚊雞」；其三，以一蚊召返嚟妓女（雞），索性呌「一蚊雞」。