[原創]韻母ui和eoi可否歸並

jumpsey

我個人認爲可以歸並，因爲現有嘅韻母ui和eoi所轄嘅字基本係互補嘅，首先睇下由呢两個韻母構成嘅音節： 　　-　b　p　m　f　d　t　n　l　g　k ng　h gw kw　z　c　s　j　w ui　　杯 胚 煤 灰 　 　 　 　 癐 繪 　 　 　 　 　 　 　 　 回 eoi 　　　　　　　堆 推 女 雷 居 拘 　 虚 　 　 追 吹 需 銳 由上表可以睇到，除咗癐gui、繪kui和居geoi、拘keoi呢两組音節之外，其馀音節都係互補嘅。而我認爲，在韻母eoi之前加u介音，就可以好自然噉發出ui嘅音，若将u介音拼作聲母，癐gui、繪kui則可分别拼成gweoi、kweoi，噉樣，ui、eoi韻母嘅音節就完全互補喇。再睇睇ui韻嘅其他音節，将回wui改拼爲weoi，發音實在感覺唔到有乜嘢唔同；杯bui、胚pui、煤mui、灰fui都係唇音聲母，改拼爲beoi、peoi、meoi、feoi之後，睇起身虽然冇咗u音，但係由於唇音聲母嘅影嚮，仍然不可避免噉带有u介音，虽然有所弱化，但确實存在，聽感上同ui韻差别並唔大，根據音位歸並嘅相似性原則，将佢地歸並爲eoi韻當無不妥。至此，對於廣州音嚟讲，ui韻就可以全部並入eoi韻喇。當然，對於某啲方音，u介音相當顯著，而且连堆deoi、推teoi、女neoi、追zeoi等本屬eoi韻嘅音都带u音，則可将eoi韻歸爲ui韻。如此，韻母ui和eoi就可以歸並爲如下嘅風貌喇： 　　　　-　b　p　m　f　d　t　n　l　g　k ng　h gw kw　z　c　s　j　w eoi/ui　　杯 胚 煤 灰 堆 推 女 雷 居 拘 　 虚 癐 繪 追 吹 需 銳 回 　 　 　 　 　 　 　 以上只係我個人嘅體會，喺度提出嚟請大家指正，多謝。

highyun

喺eoi前面加u介音，发音的确好似ui，你嘅发现好有意思，不过始终有微小嘅分别，例如weoi同wui就唔同，你再体会吓。 我觉得eoi同ui始终唔可以归并。佢哋之间嘅分别比eo、oe之间嘅分别更大。 不过话时话，ui同eoi嘅关系确实好密切，我有个海南亲戚就系将eoi发成ui嘅。 “对唔对”佢会读成“dui唔dui”

小狼

在斗門、台山、新會、開平、恩平、江門、東莞等地，eoi會唸成ui。見李新魁等：《廣州方言研究》，頁147

superjill

楼上有呢本书？ 可否借来复印？

highyun

小狼在2006-3-13 1:08:53說道：[br]在斗門、台山、新會、開平、恩平、江門、東莞等地，eoi會唸成ui。見李新魁等：《廣州方言研究》，頁147

我以前个英文阿sir系海南人，佢都系将eoi读成ui嘅。

itxu2k

肇庆方言入面就冇[eoi]韵母,对应嘅字全部发[ui]韵 但系我觉得[eoi]同[ui]合并不尽合理 [eoi]韵有好明显嘅唇形,简单噉加个解释唔到读音嘅真正差异

superjill

绝对唔得 其实噉样系翻咗汉语拼音同样有嘅失误 汉语拼音“u”喺唔同嘅声母前面有唔同嘅读音，但系“yu”呢个配搭就有另外一种读音系煲冬瓜里面无嘅，就系[ju]，类似英文you嘅发音，而且以前小学嗰时好多学生啱啱见到yuan就读成ywan 加上highyun举嘅例 更加可以讲明改咗之后，容易会误导某啲人读咗另一个音，所以我觉得都系唔可以合并 容易产生分歧嘅嘢，就应该用直观嘅方法加以区分，而唔系合并再加上说明，因为说明唔系个个人都识得去了解，就好似……简体字，哈哈

小狼

我喺大學圖書館裏面搵到呢本書嘅，佢哋規定唔可以複印，對唔住呀>.<~~ 我同意highyun嘅結論，呢兩個韻唔應該合併標示，不過兩者間嘅關係確係好密切嘅^^

禾苗小昭

ui和eoi发音始终有分别。 我来自广西南宁，南宁白话当中所有的eoi都发成ui音。